रमेश हतुवाली/काठमाडौं । चिनियाँ नव वर्ष बसन्त चाडको उपलक्ष्यमा काठमाडौंमा दीप प्रज्वलन गरिएको छ । नेपालस्थित चिनियाँ राजदूतावास, नेपाल पर्यटन बोर्ड र काठमाडौं महानगरनगरपालीकाको संयुक्त आयोजनामा काठमाडौंको रत्नपार्कमा एक भव्य समारोहबीच सो दीप प्रज्वलनको प्रदर्शनी र चिनियाँ नव वर्ष बसन्त चाडको शुभकामना आदान प्रदान गरिएको हो ।

नेपालका लागि चिनियाँ राजदूत छन् सोङ र संस्कृति, पर्यटन तथा नागरिक उड्डयन मन्त्री सुदन किरातीले संयुक्त रुपमा हिजो साँझ ड्रागन आकारको लाल्टिनमा बटनमार्फत दीप प्रज्वलन गर्नुभएको थियो । चिनियाँ परम्परागत चन्द्र पात्रो अनुसार लाल्टिन प्रज्वलन कार्यक्रम नव वर्षको आकर्षण र महिमालाई उजागर गर्ने अवसरको रुपमा गरिएको हो । बसन्त चाडमा बालीने बत्तिले चीसो मौसमलाई न्यानो बनाउँछ भन्ने चिनियाँ मान्यता रहेको छ । 

सो अवसरमा बोल्नुहुँदै नेपालका लागि चिनियाँ राजदूत छन् सोङले बत्तिलाई आशा र प्रकाशको प्रतिकको रुपमा हेरिएको उल्लेख गर्नुभयो । चीनको लाल्टिन उत्सव र नेपालको तिहार चाड दुवै देशका महत्वपूर्ण पर्व भएको र यस्ता पर्वहरुले शान्ति, समृद्धि र सुस्वास्थ्यको कामना व्यक्त गर्ने उहाँको भनाई छ ।

दीप अर्थात बत्तिले अघिको बाटो.देखाउने हुँदा विगतका वर्षमा चीन र नेपालले एकअर्कालाई बाटो देखाउँदै संगसँगै अगाडि बढेको राजदूत छन् सोङले बताउनु भयो । चिनियाँ नव वर्ष बसन्त चाडको शुभकामना व्यक्त गर्नुहुँदै राजदूत छन् सोङले चीन र नेपालबीचको राजनैतिक तथा पारस्परिक विश्वास निरन्तर रुपमा सुदृढ हुँदै गएको र आर्थिक, व्यापारिक तथा साँस्कृतिक आदानप्रदान झनै नजिकिएको भन्दै खुसी व्यक्त गर्नुभयो । 

राजदूत छन् सोङले चीन र नेपालबीचको रणनीतिक साझेदारीले फड्को मार्दै नयाँ उचाई हासिल गरेको पनि बताउनु भयो । समारोहमा बोल्नुहुँदै संस्कृति, पर्यटन तथा नागरिक उड्डयन मन्त्री सुदन किरातीले चीनमा यस वर्ष मनाईने ड्रागन नव वर्ष साहस, शक्ति र भाग्यको प्रतिक मानिएझै चीनलाई पनि शक्ति र भरोसा गर्न सकिने राष्ट्रको उचाइमा पुर्याउन सकिने बताउनु भयो । मन्त्री किरातीले बसन्त चाडको उपलक्ष्यमा चिनियाँ जनतालाई शुभकामना दिनुहुँदै नेपाल र चीनबीचको सम्बन्ध हिमालझै अटल रहने विश्वास व्यक्त गर्नुभयो । 

समारोहमा चिनियाँ संस्कृति झल्काउने विभिन्न नृत्यहरु प्रस्तृत गरिएको थियो । साथै नृत्य मार्फत प्राचीन चिनियाँ चियाबारीकोे प्रेमगीत, सुनौलो दिन आदिको साँकेतिक भाव प्रस्तृत गरिएको थियो भने नेपाली र चिनियाँ संस्कृति झल्काउने दीप पनि प्रदर्शन गरिएको थियो ।