रे समाचार/काठमाण्डू । काठमाण्डूबाट रसुवाको स्याफ्रुबेसी उडेको एयर डाइनेस्टीको हेलिकप्टर दुर्घटनामा परेको छ । 

नुवाकोटको शिवपुरीमा एयर डाइनेस्टीको हेलिकप्टर दुर्घटना हुँदा पाँच जनाको मृत्यु भएको छ । मृत्यु हुनेमा चार पुरुष र एक महिला रहेका छन् ।    
नुवाकोटका प्रहरी उपरीक्षक शान्तिराज कोइरालाका अनुसार शिवपुरी गाउँपालिका-७ शिवपुरी जङ्गलको सूर्यचौर क्षेत्रमा हेलिकप्टर दुर्घटना भएको हो । “घटनास्थलमा केही सुरक्षाकर्मी र स्थानीयवासी पुगेका छन् । उनीहरुले हेलिकप्टरमा लागेको आगो निभाइरहेका छन्”, उहाँले भन्नुभयो । 

सो हेलिकप्टर आज दिउँसो १ बजेर ५४ मिनेटमा काठमाण्डूबाट रसुवाको स्याफ्रुबेसीका लागि उडेको नागरिक उड्डयन प्राधिकरणले जनाएको छ । प्राधिकरणका अनुसार उक्त हेलिकप्टर क्याप्टेन अरुण मल्लले उडाउनु भएको थियो । अहिले सुरक्षाकर्मीको टोली दुर्घटनास्थलमा पुगेर उद्धारको काम भइरहेको प्रहरीको भनाइ छ । हेलिकप्टरमा ४ जना चिनियाँ यात्रुहरु रहेको बताईएको छ । दुर्घटनामा क्याप्टेनसहित सबैको निधन भएको प्रहरीको भनाइ छ ।