रमेश हतुवाली/काठमाण्डू । काठमाण्डूमा जारी तीन दिने अन्तर्राष्ट्रिय पश्मिना मेला, २०२५ भव्य रुपमा सम्पन्न भएको छ । नेपाल पश्मिना उद्योग संघको आयोजना र नेपाल उद्योग परिसंघको सहकार्यमा भृकुटीमण्डपमा सञ्चालन गरिएको सो मेला भव्य रुपमा सम्पन्न भएको आयोजकहरुले बताएका छन् ।  

नेपाल पश्मिना उद्योग संघको २५ औं वार्षिकोत्सवको अवसरमा आयोजना गरिएको सो मेलामा पस्मिना उद्योग, त्यसको व्यवसायमा सम्लग्नहरु, पस्मिना उद्योगबाट मुलुकले प्राप्त गर्न सक्ने लाभ लगायतका विविध विषयमा जानकारी गराउन सकिएको हुनाले पनि मेला सोचे भन्दा राम्रो भएको नेपाल पश्मिना उद्योग संघका अध्यक्ष धन प्रसाद लामिछानेले रे टेलिभिजनलाई बताउनुभयो । पछिल्लो समय भेडा, च्याङरा र चौरी पाल्ने कृषकहरुको संख्या घटिरहेको जानकारी दिनुहुँदै अध्यक्ष लामिछानेले पशुपालक कृषहरुलाई सरकारले सहयोग गर्ने हो भने नेपाली पस्मिना बेचेर पनि मुलुकलाई समृद्ध बनाउन सकिने विश्वास व्यक्त गर्नुभयो । गोठदेखि धागोसम्म, धागोदेखि फेसनसम्म भन्ने मूल नाराका साथ सुरु गरिएको पस्मिना मेला उलब्धिमुलक रहेको अध्यक्ष लामिछानेको भनाइ छ । 

धन प्रसाद लामिछाने, अध्यक्ष, नेपाल पश्मिना उद्योग संघ

सो मेला व्यवस्थापनको जिम्मेवारी लिएको राईजिङ नेपाल इभेन्ट म्यानेजमेण्टका व्यवस्थापक पशुपति केसीले मेला ऐतिहासिक भएकोे र भव्य रुपमा सम्पन्न भएको जानकारी दिनुभयो । आम नेपाली उपभोक्तामा विदेशी कपडाहरुको प्रयोग गर्ने बानी बसिसकेको अवस्थामा नेपाली उत्पादन पस्मिनाबारे मिहीम ढंगबाट राजनीतिक नेतृत्वदेखि आम सर्वसाधारण सम्मलाई जानकारी दिन सक्नु मेलाको महत्वपूर्ण उपलब्धि भएको व्यवस्थापक केसीको भनाइ छ । 

पशुपति केसी, व्यवस्थापक, राईजिङ नेपाल इभेन्ट म्यानेजमेण्ट

उद्योग, वाणिज्य तथा आपूर्ति मन्त्री दामोदर भण्डारीले शुभारम्भ गर्नुभएको सो मेलामा दश हजार भन्दा धेरैले सहभागीता जनाएको आयोजक समितीको भनाइ छ ।