रे समाचार/काठमाडौं । शेयर बजारमा आज सामान्य गिरावट आएको छ । अघिल्ला दुई कारोबार दिनदेखि घटेर बन्द भएको शेयर बजार मापक नेप्सेले आज पनि सोही क्रमलाई निरन्तरता दिएको हो ।

नेप्से परिसूचक आज १०.६६ अंक घटेर २६३३.२७ विन्दुमा झरेको छ । नेप्सेसँगै आज कारोबार रकम पनि घटेको छ । हिजो ९ अर्बभन्दा बढीको शेयर खरिदबिक्री भएकोमा आज ८ अर्ब ९२ करोड ४० लाख ६५ हजार रुपैयाँबराबरको शेयर खरिदबिक्री भएको छ । आज न्यादी हाइड्रोपावरको शेयर सकारात्मक सर्किट लेभलमा कारोबार भएको छ । यसैगरी, जानकी फाइनान्स, ग्रिन डेभलपमेन्ट बैंक र सामुदायिक लघुवित्त वित्तीय संस्थाको शेयरमूल्य करिब १० प्रतिशतले वृद्धि भएको छ । सप्तकोशी डेभलपमेन्ट बैंकको शेयरमूल्य भने सर्वाधिक ८.४६ प्रतिशतले घटेको छ । 

कारोबार रकमका आधारमा आज सिन्धु विकास बैंक शीर्ष स्थानमा रहेको छ । सो बैंकको २९ करोड ८३ लाख रुपैयाँबराबरको शेयर कारोबार भएको छ । यसैगरी, सप्तकोशी डेभलपमेन्ट बैंकको करिब साढे २८ करोडको शेयर खरिदबिक्री भएको छ भने एनआरएन इन्फ्रास्ट्रक्चर एण्ड डेभलपमेन्टको करिब २७ करोडको शेयर किनबेच भएको छ । १३ उपसमूहमध्ये आज ५ वटा उपसमूहको परिसूचक बढेको छ भने ८ उपसमूहको परिसूचक घटेको छ ।