रे समाचार/काठमाडौं । साताको अन्तिम कारोबार दिन आज शेयर बजार उच्च अंकले वृद्धि भएको छ । पछिल्ला ७ कारोबार दिनदेखि बढिरहको शेयर बजार मापक नेप्सेले आज पनि सोही क्रमलाई निरन्तरता दिएको हो ।

आज नेप्से परिसूचक ४९.१५ अंकले वृद्धि भई २८१५.०४ विन्दुमा पुगेको छ । शेयर बजारमा आज नेपाल राष्ट्र बैंकले सार्वजनिक गरेको मौद्रिक नीतिको अर्धवार्षिक समीक्षाको सकारात्मक प्रभाव परेको हो । केन्द्रिय बैंकले बैंकहरुले भविष्यमा गर्नुपर्ने कर्जा नोक्सानी बापत छुट्याउनु पर्ने रकम घटाउनुका साथै लघुवित्तको आधार दर अनुसार कर्जा दर तय गर्न पाउने व्यवस्था गरेको थियो । यो नीतिको सकारात्मक प्रभावले आज नेप्से र कारोबार रकम दुबै बढ्न पुगेको हो । 

नेप्सेसँगै आज कारोबार रकम पनि वृद्धि भएको छ । हिजो ९ अर्ब ९० करोडको शेयर खरिदबिक्री भएकोमा आज ११ अर्ब ३९ करोड २४ लाख १ हजार रुपैयाँबराबरको शेयर खरिदबिक्री भएको छ । गार्डियन माइक्रो लाइफ इन्स्योरेन्सको शेयर निरन्तर १३ औँ कारोबार दिन सकारात्मक सर्किट लेभलमा कारोबार भएको छ । यसैगरी, अप्पर हेवाखोला हाइड्रोपावर, सिन्धु विकास बैंक र दोर्दी खोला जलविद्युत्को शेयर सकारात्मक सर्किट लेभलमा कारोबार भएको छ । भूगोल इनर्जी डेभलपमेन्ट कम्पनीको शेयरमूल्य भने आज सर्वाधिक ७.१७ प्रतिशतले घटेको छ ।

कारोबार रकमका आधारमा आज हिमालयन रि इन्स्योरेन्स शीर्ष स्थानमा रहेको छ । सो कम्पनीको ९६ करोड ४७ लाख रुपैयाँबराबरको शेयर खरिदबिक्री भएको छ । यसैगरी, नेपाल पुनर्बीमा कम्पनीको करिब साढे ७६ करोडको शेयर कारोबार भएको छ भने एनआरएन इन्फ्रास्ट्रक्चर एण्ड डेभलपमेन्टको साढे ४६ करोडभन्दा बढीको शेयर किनबेच भएको छ । आज १३ वटै उपसमूहको परिसूचक बढेको छ । जसमध्ये बैंकिङ्ग उपसमूहको परिसूचक सर्वाधिक ३.३२ प्रतिशतले वृद्धि भएको छ ।