रे समाचार/काठमाडौं । शेयर बजारमा आज गिरावट आएको छ । हिजो करेक्सन भएर बन्द भएको शेयर बजार मापक नेप्सेले आज पनि सोही क्रमलाई निरन्तरता दिएको हो ।
आज नेप्से परिसूचक ३०.३६ अंक घटेर २८४६.३० विन्दुमा झरेको छ । नेप्सेसँगै आज कारोबार पनि घटेको छ । हिजो १४ अर्ब २८ करोडको शेयर खरिदबिक्री भएकोमा आज १२ अर्ब ९४ करोड ६४ लाख ९३ हजार रुपैयाँबराबरको शेयर खरिदबिक्री भएको छ । गार्डियन माइक्रो लाइफ इन्स्योरेन्सको शेयर आज पनि सकारात्मक सर्किट लेभलमा कारोबार भएको छ । आत्मनिर्भर लघुवित्तको शेयरमूल्य साढे ६ प्रतिशतले बढेको छ भने युनिभर्सल पावर कम्पनीको शेयरमूल्य साढे ५ प्रतिशतभन्दा बढीले वृद्धि भएको छ । सिन्धु विकास बैंकको शेयरमूल्य भने आज सर्वाधिक १० प्रतिशतले घटेको छ ।
कारोबार रकमका आधारमा आज हिमालयन रि इन्स्योरेन्स शीर्ष स्थानमा रहेको छ । सो कम्पनीको १ अर्ब ९ करोड ३० लाख रुपैयाँबराबरको शेयर खरिदबिक्री भएको छ । यसैगरी, नेपाल पुनर्बीमा कम्पनीको ५४ करोडभन्दा बढीको शेयर कारोबार भएको छ भने सिन्धु विकास बैंकको ४७ करोडभन्दा बढीको शेयर किनबेच भएको छ ।
