सन्तोष गौतम/म्याग्दी । प्राकृतिक उपचार स्थलको रुपमा परिचित म्याग्दीको बेनी नगरपालिका वडा नम्वर ४ मा रहेको सिंगा तातोपानी कुण्डमा स्नान स्थलको क्षमता विस्तार गर्न थालिएको छ । 

तातोपानी कुण्ड व्यवस्थापन समितिले उपल्लो तातोपानी बजारको नजिकै सार्वजनिक जग्गामा नयाँ पोखरी निर्माण गरेर स्नान स्थलको क्षमता बढाउन थालेको हो । तातोपानी स्नान गरेर उपचारका लागि आउनेहरुको चाप बढेपछि क्षमता विस्तार गर्न लागिएको छ । 

म्याग्दी नदीको किनारमा रहेको मुहानबाट तातोपानीलाई पम्पीङ गरेर स्नानका लागि संकलन गर्न नयाँ पोखरी निर्माणको काम अन्तिम चरणमा पुगेको छ । कुण्डमा स्नानका लागि आउनेहरुले तिर्ने प्रवेश शूल्कले निर्माण सामग्री खरिद, मजदुरको ज्याला ब्यवस्थापन र श्रमदान जुटाएर नयाँ स्नानस्थल बनाउन लागिएको हो । 

१५/१५ फिट लम्बाई चौडाई र दुई दशमलब पाँच फिट उचाई भएको पोखरीमा एक पटकमा ८० जनाले स्नान गर्न सक्ने क्षमता रहेको छ । हालको तातोपानी स्नानस्थल भन्दा केही माथि म्याग्दी नदीको किनारमा बिरेनुनको गन्धमा ५० डिग्री सेल्सियस तातोपानी निस्कने मुहान छ । उक्त मुहानको पानीलाई विद्युतीय उपकरणको सहायताले पोखरीमा पुर्याउने संरचना निर्माण भएको छ । 

स्नानस्थल नजिकै सार्वजनिक शौचालय बनाउन लागिएको छ । तातोपानीमा स्नान गरेर छाला, ग्यास्ट्रिक, वाथ, चोटपटक लागेको स्वास्थ्य समस्या निको हुने गरेको जनविश्वास छ । आर्थिक वर्ष २०८०/०८१ मा नेपालका ५९ वटा जिल्ला, भारत, रसिया, फ्रान्स र जापानका ४४ हजार जनाले तातोपानीमा स्नान गरेका समितिको तथ्याङ्क छ । सो स्नानगृहमा ३ सय ५० का दरले शूल्क तिरेर ७ देखि १० दिनसम्म स्नान गर्न पाइन्छ । 

छोटो अवधीमा स्नान गर्नेहरुका लागि प्रतिपटक १ सय ५० शूल्क तोकिएको छ । हिजोआज बिरामी, पर्यटक र पाहुनाका लागि स्नान गर्न दुई वटा फरक-फरक पोखरी छन् । भ्रमण आउने र जाडो याममा स्नान गर्नेहरुहरुको मंसिर देखि फागुन चैत महिनासम्म घुइँचो लाग्ने गर्छ ।

ठूलो पोखरीमा एक पटकमा तीन सय जनाले स्नान गर्न सक्ने क्षमता छ । पाहुनाको चाप बढेकाले दुई/दुई घण्टाको दरले तीन वटा समूह बनाएर स्नानको व्यवस्था मिलाइएको छ । हाल दैनिक एक हजार जनाले तातोपानी कुण्डमा स्नान गरिरहेका छन् ।