रे समाचार/काठमाडौं । शेयर बजार आज पनि घटेर बन्द भएको छ । अघिल्ला दुई कारोबार दिनदेखि घटिरहेको शेयर बजार मापक नेप्सेले आज पनि सोही क्रमलाई निरन्तरता दिएको हो । 

नेप्से परिसूचक आज २५.१६ अंकले घटेर २८२१.१३ विन्दुमा झरेको छ । नेप्सेसँगै आज कारोबार रकम पनि घटेको छ । हिजो करिब १३ अर्बको शेयर खरिदबिक्री भएकोमा आज १० अर्ब ९७ करोड २६ लाख ५४ हजार रुपैयाँबराबरको शेयर खरिदबिक्री भएको छ । आज दुई वटा स्टकको शेयर सकारात्मक सर्किट लेभलमा कारोबार भएको छ । समाज लघुवित्त वित्तीय संस्था र गार्डियन माइक्रो लाइफ इन्स्योरेन्सको शेयर सकारात्मक सर्किट लेभलमा कारोबार भएको हो । यसैगरी, उन्नती सहकार्य लघुवित्त वित्तीय संस्थाको शेयरमूल्य करिब १० प्रतिशतले वृद्धि भएको छ भने माउन्टेन हाइड्रो नेपालको शेयरमूल्य करिब ९ प्रतिशतले बढेको छ । ग्रिन डेभलपमेन्ट बैंकको शेयरमूल्य भने आज सर्वाधिक ६.८४ प्रतिशतले घटेको छ । 

कारोबार रकमका आधारमा आज हिमालयन रि इन्स्योरेन्स शीर्ष स्थानमा रहेको छ । सो कम्पनीको ९६ करोड ७० लाख ९५ हजार रुपैयाँबराबरको शेयर खरिदबिक्री भएको छ । यसैगरी, नेपाल पुनर्बीमा कम्पनीको करिब साढे ९० करोडको शेयर किनबेच भएको छ भने सगरमाथा जलविद्युत् कम्पनीको करिब ३१ करोडको शेयर कारोबार भएको छ । १३ उपसमूहमध्ये आज एउटा उपसमूहको परिसूचक बढेको छ भने १२ उपसमूहको परिसूचक घटेको छ ।