रे समाचार/पोखरा । चीनको दक्षिण पश्चिममा रहेको सछुवान प्रान्तको सदरमुकाम छन्दुबाट आएको सछुवान एयरको हवाईजहाज पोखरा अन्तर्राष्ट्रिय विमानस्थलमा अवतरण गरेको छ ।
पोखराबाट छन्दू शहरका लागि पहिलोपटक व्यावसायिक चाटर्ड उडान गर्न आज बिहान सो हवाईजहाज पोखरा अन्तर्राष्ट्रिय विमानस्थलमा अवतरण गरेको हो । यस हवाईजहाजले आजदेखि पोखराबाट छन्दूका लागि नियमित व्यावसायिक चाटर्ड उडान गर्ने बताईएको छ ।
पोखरा पर्यटन परिषद्को नेतृत्वमा पोखरा महानगरपालिका, नेपालस्थित चिनियाँ दूतावास, सछुवान एयरलायन्स र नेपालस्थित चाइनिज एसोसिएसनसँगको सहकार्यमा पहिलो पटक पोखराबाट छन्दूमा व्यावसायिक ‘चार्टर्ड’ उडान भएको हो ।
पोखरा अन्तर्राष्ट्रिय विमानस्थल उद्घाटन भएको दुई वर्षसम्म नियमित अन्तर्राष्ट्रिय उडान हुन नसकेको अवस्थामा पहिलोपटक छन्दूका लागि सछुवान एयरको हवाईजहाजमार्फत चार्टर्ड उडान हुनुलाई महत्वपूर्ण संकेतको रुपमा हेरिएको छ । आज सछुवान एयरलायन्सको विमानबाट १ सय २६ जना यात्रु छन्दू गएका छन् ।
उडान नियमित गर्ने प्रयास स्वरुप सछुवान एयरलायन्सले छन्दूबाट तीनवटा चार्टर्ड उडान गर्ने सुनिश्चित गरिसकेको पोखरा पर्यटन परिषद्का महासचिव जीवनराज सापकोटाले जानकारी दिनुभएको छ । एयरलायन्सले तीनवटा चाटर्ड उडान पछि नियमित उडानको भाडादरसहित उडान तालिका ल्याउने जनाएको छ । प्राप्त जानकारी अनुसार चीनस्थित चाइना ट्राभल्स इन्टरनेशनल छन्दूले सुरुवाती उडानमा सहकार्य गरिरहेको छ । चार्टर्ड उडानका लागि एयरलायन्सले तत्काललाई प्रतिव्यक्ति ६२ हजार रुपैयाँ भाडा तय गरेको छ ।
यो उडानले पोखरा र समग्र गण्डकी प्रदेशकै पर्यटन चलायमान हुने विश्वास लिइएको सापकोटाको भनाइ छ । यस उडानमार्फत आगामी तीन महिनासम्ममा करिब १ हजार २ सय ५० जना चिनियाँ पर्यटक चीनको सछुवान प्रदेशबाट सिधा पोखरा अन्तराष्ट्रिय विमानस्थलमा अवतरण गर्नेछन् ।
