रे समाचार/काठमाडौं । शेयर बजारमा आज उच्च गिरावट आएको छ । पछिलो ५ कारोबार दिनदेखि घटिरहेको नेप्सेले यस दिन पनि सोही क्रमलाई निरन्तरता दिएको हो । शेयर बजार मापक नेप्से परिसूचक आज ५३.०४ अंकले घटेर २६१६ अंकमा कायम भएको छ ।

बजार खुलेदेखि नै निरन्तर ओरालोमा देखियो । नेप्से घटे पनि यस दिन कारोबार रकम भने बढेको छ । अघिल्लो कारोबार दिन अर्थात् गत बिहीबार साढे ४ अर्बको शेयर खरिदबिक्री भएको बजारमा आज ६ अर्ब ३२ करोड १ लाख ४१ हजार रुपैयाँबराबरको शेयर खरिदबिक्री भएको छ । आज मूल्य बढेका स्टकहरूको वृद्धिदर भने ४ प्रतिशतभन्दा कम रहेको छ । मिथिला लघुवित्त वित्तीय संस्थाको शेयर नकारात्मक सर्किट लेभलमा कारोबार भएको छ ।

कारोबार रकमका आधारमा आज हिमालयन रि इन्स्योरेन्स शीर्ष स्थानमा रहेको छ । सो कम्पनीको ४२ करोड ६ लाख रुपैयाँबराबरको शेयर खरिदबिक्री भएको छ । यसैगरी, एनआरएन इन्फ्रास्ट्रक्चर एण्ड डेभलपमेन्टको करिब ३६ करोडको शेयर कारोबार भएको छ भने नेपाल पुनर्बीमा कम्पनीको करिब ३५ करोडको शेयर किनबेच भएको छ ।

आज १३ वटै उपसमूहको परिसूचक घटेको छ । जसमध्ये वित्त उपसमूहको परिसूचक सर्वाधिक २.९९ प्रतिशतले घटेको छ । यसैगरी, विकास बैंक, होटल तथा पर्यटन, जलविद्युत्, लगानी, लघुवित्त, निर्जीवन बीमा र व्यापार उपसमूहको परिसूचक २ प्रतिशतभन्दा बढीले घटेको छ भने बैंकिङ्ग, जीवन बीमा, उत्पादन तथा प्रशोधन र अन्य उपसमूहको परिसूचकमा १ प्रतिशतभन्दा बढीको गिरावट आएको छ । 

यही चैत १५ गतेदेखि राजावादी र गणतन्त्रवादीले छ्ुट्टा छुट्टै आन्दोलनको घोषणा गरेपछि लगानीकर्ताहरुको मनोबल खस्केको विज्ञहरुले बताएका छन् । चैत महिना लागेपछि राजनीतिक अस्थिरता बढ्ने संकेतकै कारण शेयर बजारमा लगातार गिरावट आएको बताइएको छ ।