रमेश हतुवाली/काठमाडौं । राजसंस्थावादीले काठमाडौंको तीनकुनेमा निकालेको जुलुसमा प्रहरीले ८ राउन्ड गोली प्रहार गरेको छ । गोली लागेर एक जना प्रदर्शनकारी घाइते भएका छन् । झडपमा सशस्त्र प्रहरीका ७ जना पनि घाइते भएका छन् । घाइतेहरुको तीनकुनेस्थित कान्तिपुर अस्पतालमा उपचार भइरहेको छ  

आन्दोलनकारीले तीनकुनेका केही घरहरुमा तोडफोड र आगजनी गर्न थालेपछि गोली प्रहार गर्न प्रहरी बाध्य भएको थियो ।। प्रहरीले सयौं राउन्ड अश्रुग्यास प्रहार गर्दा पनि स्थिति नियन्त्रणमा आउन नसकेपछि गोली प्रहार गर्नु परेको प्रहरीले जनाएको छ ।

गोली प्रहार र अश्रुग्यासको प्रहारबाट आन्दोलनकारीहरु तितरबितर हुने र पुनः जुट्ने क्रम जारी रहेको छ । आन्दोलनकारीले तयार पारेका मञ्च प्रहरीले आफ्नो नियन्त्रणमा लिएको छ । तीनकुने क्षेत्र अहिले रणमैदानमा परिणत भएको छ । प्रहरीले सिनामंगलतिरबाट आउने आन्दोलनकारीलाई रोक्ने प्रयास गरिरहेको छ । जति प्रयास गरे पनि आन्दोलनकारीहरू एकछिनमै जुटेर पुनः प्रदर्शनमा उत्रिने गरेका छन् ।