रे समाचार/काठमाडौं । पछिल्ला दुई कारोबार दिनदेखि बढिरहेको शेयर बजारले आज पनि सोही क्रमलाई निरन्तरता दिएको छ । शेयर बजार मापक नेप्से परिसूचक आज २९.८२ अंकले बढेर २६९३.१२ विन्दुमा पुगेको छ ।

नेप्सेसँगै आज कारोबार रकम पनि बढेको छ । गत बिहीबार ५ अर्ब २२ करोडको शेयर खरिदबिक्री भएकोमा आज ७ अर्ब ५६ करोड ८२ लाख २६ हजार रुपैयाँ बराबरको शेयर खरिदबिक्री भएको छ । आज जोशी हाइड्रोपावर डेभलपमेन्ट कम्पनीको शेयरमूल्य सर्वाधिक ९.९४ प्रतिशतले वृद्धि भएको छ । यसैगरी, दोर्दी खोला जलविद्युत् कम्पनीको शेयरमूल्य साढे ६ प्रतिशतभन्दा बढीले बढेको छ ।

कारोबार रकमका आधारमा आज हिमालयन रि इन्स्योरेन्स शीर्ष स्थानमा रहेको छ । सो कम्पनीको ६९ करोड १९ लाख रुपैयाँबराबरको शेयर खरिदबिक्री भएको छ । यसैगरी, नेपाल पुनर्बीमा कम्पनीको करिब ४८ करोडको शेयर किनबेच भएको छ भने एनआरएन इन्फ्रास्ट्रक्चर एण्ड डेभलपमेन्टको साढे ३९ करोडभन्दा बढीको शेयर कारोबार भएको छ । १३ उपसमूहमध्ये आज ११ उपसमूहको परिसूचक बढेको छ भने २ वटा उपसमूहको परिसूचक घटेको छ । लगानी उपसमूहको परिसूचक आज सर्वाधिक २.१८ प्रतिशतले बढेको छ ।