रे समाचार/काठमाडौं । अघिल्ला तीन कारोबार दिनदेखि बढिरहेको शेयर बजारमा आज करेक्सन आएको छ । अल्पकालीन लगानीकर्ताहरूले नाफा बुक गरेसँगै आज शेयर बजार मापक नेप्सेमा करेक्सन भएको हो ।

आज नेप्से परिसूचक १६.९५ अंकले घटेर २६७६.१७ विन्दुमा झरेको छ । नेप्सेसँगै आज कारोबार रकम पनि घटेको छ । आइतबार साढे ७ अर्बको शेयर खरिदबिक्री भएकोमा आज ५ अर्ब ७९ करोड ७७ लाख ९१ हजार रुपैयाँबराबरको शेयर खरिदबिक्री भएको छ । आज गार्डियन माइक्रो लाइफ इन्स्योरेन्सको शेयर सकारात्मक सर्किट लेभलमा कारोबार भएको छ । यसैगरी, राधी विद्युत् कम्पनी, सयपत्री हाइड्रोपावर र विशाल बजार कम्पनीको शेयरमूल्य ४ प्रतिशतभन्दा बढीले वृद्धि भएको छ । गुराँस लघुवित्त वित्तीय संस्थाको शेयरमूल्य सर्वाधिक ५.५६ प्रतिशतले घटेको छ ।

कारोबार रकमका आधारमा आज हिमालयन रि इन्स्योरेन्स शीर्ष स्थानमा रहेको छ । सो कम्पनीको ६४ करोड २५ लाख रुपैयाँबराबरको शेयर कारोबार भएको छ । यसैगरी, एनआरएन इन्फ्रास्ट्रक्चर एण्ड डेभलपमेन्टको साढे ४५ करोडभन्दा बढीको शेयर खरिदबिक्री भएको छ भने सिईडिबी होल्डिङ्खसको करिब २८ करोडको शेयर किनबेच भएको छ । १३ उपसमूहमध्ये आज १२ वटा उपसमूहको परिसूचक घटेको छ भने एउटा उपसमूहको परिसूचक बढेको छ । व्यापार उपसमूहको परिसूचक ३.८० प्रतिशतले वृद्धि भएको हो ।