रमेश हतुवाली/काठमाण्डू । काठमाण्डूमा परम्परागत तिब्बती औषधी र तिब्बती धूपको हजार वर्ष पुरानो विरासत विषयक एक दिने परिचयात्मक कार्यक्रम सम्पन्न भएको छ ।

महाराजगञ्जस्थित चिनियाँ सांस्कृतिक केन्द्रमा आयोजित सो कार्यक्रमका सहभागिहरुले परम्परागत तिब्बती औषधी र तिब्बती सुगन्धित धूपको एक हजार वर्ष पुरानो विरासतका विभिन्न पक्षमा अनुभव आदान प्रदान गरेका थिए । सो समारोहमा तिब्बती औषधि र तिब्बती धूपका बारेमा विस्तृत जानकारी दिनुुहुँदै रुओ अरकाई च्याछो तिब्बती चिकित्सा विकास कम्पनी लिमिटेडका कार्यकारी निर्देशक कोङ छुई च्याछौ ले तिब्बत र नेपालमा ऐतिहासिक कालदेखि प्रचलनमा रहँदै आएको धूप बाल्ने परम्परा बारे जानकारी दिनुभयो । 

कोङ छुई च्याछौ, कार्यकारी निर्देशक, रुओ अरकाई च्याछो तिब्बती चिकित्सा विकास कम्पनी लिमिटेड 

कार्यकारी निर्देशक च्याछौले धूप सुगन्ध वा इश्वरलाई पूजा गरिने सामग्री मात्र नभएर यसको प्रयोगले मानसीक थकाई कम गर्ने, मानिसहरुमा उत्साह र जाँगर सृजना गर्ने र विभिन्न रोगहरु निको पार्ने बताउनुभयो । तिब्बती धूप बनाउने तरिका र नेपाली धूप बनाउने तरिकामा केही भिन्नता रहेको जानकारी दिनुहुँदै कार्यकारी निर्देशक च्याछौले तिब्बती धूपको निर्माण गर्दा कम्तीमा पनि ३० किसिमका अमूल्य जडिबुटीहरुको प्रयोग गरिने बताउनु भयो । 

कार्यकारी निर्देशक च्याछौले शरीरलाई स्वस्थ र स्फुर्त राख्न खेल खेल्ने, योग गर्ने लगायतका कामहरु भैरहे जस्तै धूपको प्रयोगबाट पनि मानसिक शान्ति र सरीरलाई आनन्द दिन सकिने बताउनु भयो । 

कार्यकारी निर्देशक च्याछौले प्राकृतिक धूप हेर्दा त्यत्ति राम्रो नदेखिने भए पनि त्यो मानव स्वास्थ्यका लागि महत्वपूर्ण रहेको बताउनुभयो । उहाँले अप्राकृतिक धूपको प्रयोगबाट सुगन्ध धेरै लिन सकिने भए पनि त्यो स्वास्थ्यका लागि घातक हुने जानकारी दिनुभयो । कार्यकारी निर्देशक च्याछौले सहभागीहरुलाई धूप बनाउने र त्यसको प्रयोग गर्ने तरिका पनि सिकाउनु भएको थियो । 

कार्यक्रममा चिनियाँ भाषाका नेपाली पथ प्रर्दशक, चिनियाँ भाषाका नेपाली शिक्षक र पर्यटन क्षेत्रसँग सम्बन्धित मानिसहरुको बाक्लो उपस्थिती रहेको थियो ।