रे समाचार/काठमाडौं । साताको अन्तिम कारोबार दिन आज शेयर बजारमा सामान्य वृद्धि भएको छ । शेयर बजार मापक नेप्से परिसूचक आज ३.३५ अंक बढेर २७०३.३९ विन्दुमा पुगेको छ ।

नेप्सेसँगै आज कारोबार रकम पनि बढेको छ । हिजो करिब साढे ५ अर्बको शेयर खरिदबिक्री भएकोमा आज ७ अर्ब ८४ करोड ४६ लाख ४२ हजार रुपैयाँबराबरको शेयर खरिदबिक्री भएको छ । आज ग्रीन भेन्चर्सको शेयर सकारात्मक सर्किट लेभलमा कारोबार भएको छ । यसैगरी, सुपर मादी हाइड्रोपावरको शेयरमूल्य करिब ७ प्रतिशतले वृद्धि भएको छ भने राधी विद्युत् कम्पनीको शेयरमूल्य करिब ५ प्रतिशतले बढेको छ । उपकार लघुवित्त वित्तीय संस्थाको शेयरमूल्य भने आज सर्वाधिक ७.८५ प्रतिशतले घटेको छ । 

कारोबार रकमका आधारमा आज पनि हिमालयन रि इन्स्योरेन्स शीर्ष स्थानमा रहेको छ । सो कम्पनीको ७२ करोड ३२ लाख रुपैयाँ बराबरको शेयर खरिदबिक्री भएको छ । यसैगरी, नेपाल पुनर्बीमा कम्पनीको करिब ५६ करोडको शेयर कारोबार भएको छ भने एनआरएन इन्फ्रास्ट्रक्चर एण्ड डेभलपमेन्टको करिब ४३ करोडको शेयर किनबेच भएको छ । १३ उपसमूहमध्ये आज ४ वटा उपसमूहको परिसूचक बढेको छ भने ९ उपसमूहको परिसूचक घटेको छ ।