रोम । इरान र संयुक्त राज्य अमेरिका बीच तेहरानको आणविक कार्यक्रमसम्बन्धी दोस्रो चरणको उच्चस्तरीय वार्ता शनिबार इटालीको राजधानी रोममा सुरु हुँदैछ । एक साताअघि मस्कटमा सम्पन्न पहिलो चरणको संवादलाई दुवै पक्षले सकारात्मक र रचनात्मक भएको बताएका थिए ।     
     
इरानी परराष्ट्रमन्त्री अब्बास अराघ्ची शनिबार बिहान रोम पुग्नुभएको छ । उहाँ अमेरिकी मध्यपूर्वका विशेष दूत स्टीव विटकोफसँग वार्तामा सहभागी हुनुभएको हो। वार्ता ओमानको मध्यस्थतामा सञ्चालन भइरहेको छ ।     
     
सन् २०१८ मा अमेरिका आणविक सम्झौताबाट बाहिरिएपछि यो पहिलोपटक यति उच्चस्तरमा संवाद भइरहेको हो । सम्झौता अनुसार ईरानले आणविक कार्यक्रममा केही सीमाहरू स्वीकृत गरेको थियो, जसको सट्टामा उसमाथि लागेका अन्तर्राष्ट्रिय प्रतिबन्धहरू हटाइएका थिए ।     
     
इरानले बारम्बार आफ्नो आणविक कार्यक्रम शान्तिपूर्ण र नागरिक प्रयोजनका लागि मात्र भएको स्पष्ट पार्दै आएको छ । अमेरिकासहित केही पश्चिमी राष्ट्रहरूले ईरान आणविक हतियार बनाउन सक्ने आशंका व्यक्त गर्दै आएका छन् ।     
     
अराघ्चीले पहिलो चरणको वार्तामा अमेरिकी पक्षबाट केही गम्भीरता देखिएको बताउनुभयो, यद्यपि उहाँले अमेरिकाको उद्देश्यप्रति अझै केही आशंका रहेको उल्लेख गर्नुभयो ।     
     
संयुक्त राष्ट्रसङ्घीय आणविक निरीक्षण संस्था (आएइए) का महानिर्देशक श्री राफाएल ग्रोसीले हालैको एक अन्तर्वार्तामा अमेरिका र ईरान ‘एक अत्यन्तै संवेदनशील मोड’ मा पुगेको बताउनुभयो ।     
     
इरानले स्पष्ट रूपमा वार्ता केवल आणविक कार्यक्रम र प्रतिबन्ध हटाउने विषयमा सीमित हुनुपर्ने बताएका छन् । इरानी अधिकारीहरूले युरेनियम प्रशोधनको अधिकारलाई ‘असम्झौतायोग्य’ भनेका छन् र मिसाइल कार्यक्रम वा अन्य सुरक्षा मामिलामा कुनै पनि छलफल नगर्ने अडान दोहोर्याएका छन् ।     
     
दुवै पक्षबीचको यो वार्ता क्षेत्रीय शान्ति, स्थायित्व र अन्तर्राष्ट्रिय विश्वास निर्माणका दृष्टिले अत्यन्तै महत्वपूर्ण मानिएको छ । एएफपी